സംസ്ഥാനത്ത് അരിവില കുതിക്കുന്നു
ജനങ്ങള്‍ക്ക് ഇരുട്ടടിയായി സംസ്ഥാനത്ത് അരിവില കുതിക്കുന്നു. ജയ അരിക്കാണ് വന്‍തോതില്‍ വില വര്‍ദ്ധിച്ചിരിക്കുന്നത്. ആന്ധ്രാപ്രദേശില്‍ നിന്നള്ള അരിയുടെ വരവ് കുറഞ്ഞതാണ് വിലയുയരാന്‍ കാരണം. തെക്കന്‍ കേരളത്തില്‍ വ്യാപകമായി ഉപയോഗിക്കുന്ന ജയ അരിയുടെ വില ഡിസംബര്‍ ആദ്യവാരം 31രൂപയായിരുന്നു. ചില്ലറ വില്‍പന കേന്ദ്രങ്ങളില്‍ ഇപ്പോള്‍ വില 35 കടന്നു.മൊത്ത വിപണിയില്‍ വില 33ലെത്തി. ആന്ധ്രപ്രദേശില്‍ നിന്നുമുള്ള വാഗണുകളുടെ വരവ് കുറഞ്ഞതാണ് വില ഒറ്റയടിക്ക്‌ കയറാന്‍ കാരണം. ശബരിമല സീസണായതോടെ അരി കൊണ്ടുവരുന്നതിനുള്ള വാഗണുകളുടെ എണ്ണത്തില്‍ റയില്‍വേ കുറവു വരുത്തി. സിമന്റ് കൊണ്ടുവരുന്നത് കൂടുതല്‍ ലാഭകരമായതിനാല്‍ അരി എത്തിക്കാനായി വാഗണുകള്‍ വിട്ടു നല്‍കാന്‍ റയില്‍വേ മടിക്കുന്നതായാണ് വ്യാപാരികളുടെ ആരോപണം. വാഗണുകളില്‍ അരിയെത്തിക്കാന്‍ ക്വിന്റലിന് 170 രൂപയോളമേ ചെലവു വരൂ. എന്നാല്‍ റോഡ് മാര്‍ഗം അരിയെത്തുമ്പോള്‍ ക്വിന്റലിന് ചിലവ് 330 എത്തും. ഈ അധിക ചെലവും വഹിക്കേണ്ടി വരുന്നത് ഉപഭോക്താക്കളാണ്. ആന്ധ്രയില്‍ അടുത്ത സീസണ്‍ തുടങ്ങാന്‍ ഏപ്രില്‍ മാസമാകും. അതു കൊണ്ടു തന്നെ അരി വില അടുത്തെങ്ങും കുറയില്ലെന്നാണ് വ്യാപാരികള്‍ പറയുന്നത്. ആന്ധ്രയിലെ മില്ലുടമകള്‍ അരിയുടെ വില അടുത്തിടെ വര്‍ദ്ധിപ്പിച്ചതും പ്രതിസന്ധി സൃഷ്ടിക്കുന്നുണ്ട്. പാചകവാതക വിലവര്‍ദ്ധനവിനു പുറമേ അരിവിലയും കുതിക്കുന്നത് സാധാരണക്കാരെ ആശങ്കയിലാ‍ഴ്ത്തുന്നു.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ